Өскемен қаласындағы №4 қалалық аурухананың медицина қызметкерлері үшін АИТВ инфекциясының алдын алу тақырыбында арнайы семинар өтті. Іс-шараны Шығыс Қазақстан облыстық ЖИТС-тің алдын алу және оған қарсы күрес орталығы ұйымдастырды.
Семинардың мақсаты – медицина қызметкерлерінің АИТВ туралы білім деңгейін арттырып, күнделікті тәжірибеде жұқтыру қаупін төмендету жолдарын талқылау. Орталықтың мамандары АИТВ-ның таралу жолдары, қорғану шаралары және стигма мен дискриминацияны азайту жөніндегі ақпараттармен бөлісті.
Семинар барысында интерактивті сұрақ-жауап сессиялары өтіп, нақты клиникалық жағдайлар мысалға келтірілді. Қатысушылар жеке қорғану құралдарын дұрыс пайдалану, биологиялық қауіпсіздік талаптарын сақтау, сондай-ақ, АИТВ-мен өмір сүретін адамдарға этикалық және психологиялық тұрғыдан қалай қолдау көрсету керектігі туралы ақпарат алды.
Шара соңында қатысушыларға ақпараттық материалдар таратылып, алдағы уақытта осындай оқытулардың жиі өткізілуі туралы ұсыныстар айтылды.
